Tuesday, 31 January 2017

మనసందుకే మురిసింది

                                                                 ఓం శ్రీ సాయిరాం
                  సాయినాధుని దర్శించుకుని మనసందుకే మురిసింది అంటూ వ్రాసుకున్న సాయి సంకీర్తనా కుసుమం
                                                           మనసందుకే నేడు వేడుకలా మురిసింది
                                                                 ఏడేడులోకాలు సాయితో తిరిగింది
                                                                 ఆసాయి చరణాల ధూళినయ్యాననో
                                                                ఆస్వామి రూపాలు చూచి మురిశాననో "మ"
                                                                     ముక్కోటి దేవతలు నవ గ్రహాలు
                                                                     పంచ భూతాలు అష్ట దిక్పాలురు
                                                                       ఎవరైతేనేమి ఏ లోకమైతేనేమి
                                                                    ఆస్వామి ఆజ్ఞలో నడుచువారేననీ"మ"
                                                                    పత్రమైననుగానీ పుష్పమైననుగానీ
                                                                    ఫలములైననుగానీ ఉదకమైననుగానీ
                                                                          భక్తితో ఇచ్చునది ఏమైనగానీ
                                                                      ఆ తండ్రి ప్రీతితో స్వీకరించును అనీ "మ"
                                                                       ఏ పూర్వ పుణ్యమో ఏ నోము ఫలమో
                                                                        నీవువెలసినచోటు నేగాంచుచున్నాను
                                                                         ఎన్ని జన్మలనుండో నీతోనే ఉంటున్నా
                                                                        ఈజన్మలోనే అది తెలియుచున్నది అనీ "మ"
                                                                       
                                                                     

ఆమె అదృష్టం

                                                                    రాకేశ్,రాగిణి వేంకటేశ్వరుని కళ్యాణోత్సవానికి వెళ్లారు.అక్కడ పెద్ద మధ్య,పిన్న వయస్సు దంపతులు చాలా మంది ఉన్నారు.కళ్యాణం మొదలుపెట్టడానికి మూడు గంటల ముందు రమ్మని చెప్పడంతో అందరూ వచ్చి కూర్చున్నారు.ఇంకొక అరగంట,పావుగంట అంటూ నిర్వాహకులు చెప్పడంతో పెద్దవాళ్ళు కూర్చోలేక ఆపసోపాలు పడుతూ ఉన్నారు.ఎదురు చూడగాచూడగా అఖిలాండకోటి బ్రహ్మాండనాయకుని కళ్యాణం కన్నులపండుగగా మొదలైంది.చూడటానికి రెండు కళ్ళు చాలవన్నట్లు చాలా నిశ్శబ్దంగా కూర్చుని దాదాపు 1500 మంది ఎంతో ఆసక్తిగా కల్యాణాన్ని తిలకించారు.కల్యాణోత్సవం ఎంతో అద్భుతంగా జరిగింది.అప్పుడే అసలు ఘట్టం మొదలైంది.ఒక గంట మాత్రమే స్వామివారి అక్షింతలు వేసి పెద్దాయన ఆశీస్సులు అందజేస్తారు ఎక్కడివాళ్ళు అక్కడే కూర్చోండి అని ప్రకటించారు.ఎక్కడ తమకు అవకాశం రాదోనని వెనుక నుండి ఒక్కసారిగా ముందు వాళ్ళను తోసుకుని వచ్చేశారు.తోపులాటలో ఒక పెద్దాయన భార్య కనిపించలేదు.ఆయన ఒక్కసారిగా బిక్కమొహం పెట్టి ఏడుపు ఆపుకుంటూ భార్య కనిపించలేదన్న భాధతో దాదాపు ఐదు గంటలు కూర్చున్నాము ఒక్క అరగంట కుర్చోలేమా?స్వామి దర్శనానికి వచ్చి తోపులాటలు ఏమిటి?మనలో మార్పు ఎప్పటికి వస్తుంది?అంటూ తన భార్య కోసం కంగారు పడుతున్నాడు.పక్కనే ఉన్న రాకేశ్ కంగారు పడకండి అందరూ ఇక్కడే ఉన్నారు ఎవరూ బయటకు వెళ్ళలేదు.ఆమె ఇక్కడే ఉండొచ్చుఅని చెప్పగానే కొద్దిగా ఊపిరి పీల్చుకున్నాడు.ఒక పది ని.లకు ఇదిగో నా భార్య అని సంతోషంగా చాటంత మొహం చేసుకుని చెప్పాడు.భార్య అంటే ప్రేమ అందరికీ ఉంటుంది.కానీ ఆయనకు తన భార్య అంటే ఉన్న ప్రేమ ఆయన  కళ్ళల్లో స్పష్టంగా కనిపించింది.అది ఆమె అదృష్టం.

Wednesday, 25 January 2017

గణతంత్ర దినోత్సవ శుభాకాంక్షలు

                                             గణతంత్ర దినోత్సవ శుభాకాంక్షలు. 
                                                     

బోధ ఒక్కటే

                                                                          జైజైసాయిరాం                                                                                                      భక్తితో ఏ నామమ పలికినా ఆత్మభోధ ఒక్కటే అంటూ వ్రాసుకున్నజయంతమ్మ                                                                           సాయినాధ సంకీర్తనా కుసుమం                                  
                                                             నీ నామము పై మాకు శ్రద్ధ పెరగాలి
                                                       మాలోని సంశయాలు మటుమాయమవ్వాలి"నీ"
                                                                భాషలు వేరైనా భావము ఒక్కటే
                                                           మతములు వేరైనా మనుషులు ఒక్కటే"నీ"
                                                                 నామాలు వేరైనా,రూపాలు వేరైనా
                                                            అందరికీ చెందే ఆ పరమాత్మ ఒక్కడే "ప" "నీ"                  
                                                                    అష్టాక్షరియైనా పంచాక్షరియైనా
                                                                     భక్తితో పలికిన ఫలితం ఒక్కటే
                                                                      రామ్ రహీమ్ రమణ సాయి " 2"
                                                                    అందరూ చెప్పే ఆత్మబోధ ఒక్కటే "నీ"  

                                                         
                                                         
                                                         
                                                            

Tuesday, 24 January 2017

పిచ్చి బొంద

                                                                      యశోదమ్మ గారికి అరవై ఐదేళ్ళు.ఆవిడ దగ్గర రాజీ చిన్నప్పటి నుండి పని చేస్తుంది.రాజీకి పెళ్ళి చేసి రెండు గదులు ఉండటానికి ఇచ్చికొత్త కాపురం పెట్టించారు.చిన్నతనం నుండి ఆవిడ దగ్గరే ఉండటంతో రాజీకి యశోదమ్మ గారి దగ్గర చనువు ఎక్కువ.ఒకరోజు మైసూర్ బోండా వేసి రాజీ పిల్లలకు పెట్టమని ఒక గిన్నెలో అవసరమైనవన్నీ వేసి కలపమని చెప్పారు.రాజీ పిండి కలుపుతూ అమ్మా!మీరు మైదా బదులు గంజి పిండి వేశారు.పిండి జిగురుగా ఉంది చూడండి అంటూ ఆపకుండా 20 ని.లు నవ్వుతూనే ఉంది.అసలే పెద్ద నోరు.రాజీ నోరంతా తెరిచి కళ్ళ వెంట నీళ్ళు కారేలా నవ్వుతుంటే యశోదమ్మగారు పిండిని పట్టుకుని చూస్తే అది జిగురుగానే ఉన్నా గంజి పొడిలా అనిపించలేదు.ఏది అయితే అయిందిలే అని అది పడేసి మరలా వేరే పిండి కలపమని రాజీకి చెప్పారు.కలిపిన పిండి పడేసిన ఒక పది ని.ల  తర్వాత అది మొక్కజొన్న పిండి అని గుర్తు వచ్చింది.అయ్యో పిండిలో పెరుగు వేసి కలిపి వృధాగా పడేశాము కదమ్మా!అని తెగ బాధపడింది.పిచ్చి బొంద అదేమిటో సరిగా చూడకుండానే ఎప్పుడూ పిచ్చినవ్వులు,అన్నీ పిచ్చి పనులు చేస్తూ ఉంటావు అని రాజీని మెత్తగా మందలించారు. 

Sunday, 22 January 2017

గురువులకే సద్గురువు

                                                              ఓం శ్రీ సాయిరాం
        సాయిరాం సాయిరాం సాయిరాం అని పాడరే అంటూ జయంతమ్మ వ్రాసుకున్న సాయి సంకీర్తనా కుసుమం
                                                     సాయిరాం సాయిరాం సాయిరాం అంటూ పాడరే
                                                     ఆ చక్కని స్వామి దివ్య రూపమును చూడరే "సా"
                                                      ఆ అభయ హస్తముతో ఆశీర్వాదము పొందరే
                                                      ఆ చరణ కమలములు మీ శిరమున ఉంచరే"సా"
                                                      ఆ స్వామి చరితమును నిరంతరము పఠీయించరే
                                                            ఆ తండ్రి లీలను మీకన్నులారా కాంచరే "సా"
                                                       గురువులకే సద్గురువు అని ఆ స్వామిని నమ్మరే                  
                                                       మీ హృదయ డోలికలో ఆయనను ఊయలలూపరే "సా"
                                                              స్వామి భిక్షకు రెండు నాణెముల నీయరే
                                                              నవవిధభక్తుల సాయినాధుని కొలవరే "సా"
                                                                 షిరిడీలోనే సాయిని చూద్దామందురే
                                                       మీ మదిలో వెలిగే జ్యోతి అతడని (సాయని) నమ్మరే"సా"
                                                   

                                                     
                                    

Saturday, 21 January 2017

మిర్రు

                                                            లక్ష్య ముద్దు పేరు చిక్కీ.పేర్లు మాత్రం ఈ తరానికి తగినట్లు పెట్టుకున్నా గానీ మాటలు,చేష్టలు అన్నీ కూడా వెనుకటి తరంలో కూడా ఉపయోగించని పదాలు ఉపయోగిస్తుంది.వయసు రీత్యా లక్ష్య అమ్మమ్మకు చూపు మందగించింది.అందుకని లక్ష్య అన్నయ్య అమ్మమ్మ బంధువులతోనో,స్నేహితులతోనో ఇంకా ఎవరితోనయినా తేలికగా మాట్లాడటానికి వీలుగా ఉంటుందని అంకెలు పైకి ఉన్న ఒక మామూలు ఫోను కొనుక్కుని ఇంటికి తెచ్చాడు.అంతకు ముందు ఫోను అంకెలు సమానంగా ఉండడంతో తేలికగా అంకెలు గుర్తుపెట్టుకుని అందరి నంబర్లు తనే నొక్కి మాట్లాడేది.అమ్మ ఫోను చేసేది ఎప్పుడయినా ఎందువలన చెయ్యడం లేదు? అని లక్ష్యను అడిగితే ఫోను మిర్రుగా ఉండి నంబర్లు తెలియక చెయ్యడం లేదు అని చెప్పింది.అంటే ఏమిటో ఎదుటివారికి అర్ధం కాక మళ్ళీ అడిగితే మిర్రు అంటే మెరక.దీనికి నంబర్లు పైకి ఉన్నాయి.సమానంగా ఉంటే  అమ్మమ్మకు ఫోను చెయ్యటం తేలిక అని లక్ష్య అంది.  

Friday, 20 January 2017

సాయి స్మరణ

                                                           ఓం సాయి శ్రీ సాయి జై జై సాయి                                                                  జయంతమ్మ మనసారా సాయి స్మరణ చేయండీ అంటూ వ్రాసుకున్న సాయి సంకీర్తనా కుసుమం                                                                     భక్తులారా భజన చేయండీ
                                                 మనసారా సాయి స్మరణ చేయండీ " భ"
                                              కలియుగంబున వెలసినాడండీ షిరిడీ వాసుడు
                                                        చిత్ర విచిత్రాలు చేసినాడండీ"భ"
                                                  ఎవరి పనులు వారు చేయండీ మదిలోన
                                                  మరువకుండా సాయి స్మరణ చేయండీ "భ"
                                                  మాయ మర్మములేవీ లేవండీ రెండక్షరమ్ముల
                                                  సాయి సాయి అని నామ స్మరణ చేయండీ "భ"
                                                   కోరిన వారి కొంగు బంగారం మన సాయి దేవుడు
                                                          జ్ఞాన ధనమును కోరి పొందండీ "భ"
                                                     కాలమెప్పుడూ తిరిగి రాదండీ క్షణమైన మీరు
                                                         సాయి నామస్మరణ మరిచిపోకండీ "భ"
                                           






                                                                 
                                               
                                         

షిరిడీ సాయి పుట్టినరోజు

                                                                    ఓం శ్రీ సాయినాధాయనమః
                            జయంతమ్మ సాయి పుట్టినరోజునాడు సంతోషంగా వ్రాసుకున్న సాయి సంకీర్తనా కుసుమం
                                                 షిరిడీ సాయి పుట్టినరోజు మన అందరికీ పండుగరోజు
                                                  త్యాగం,సహనం పుట్టినరోజు భూమాత పులకించిన రోజు "షి"
                                                               అందరిలో నీరూపం సృష్టికి నీవే మూలం
                                                          జగతికి నీవే ఆధారం చిత్రమయా నీ వ్యవహారం"షి"
                                                          తల్లిదండ్రులు లేని వాడవా నీవెవరో మాకు తెలియదా
                                                          పిల్లలున్న ప్రతి జంటా నీకు తల్లి తండ్రులే కదా! "షి"
                                                           ఇంటింటా నీ నామమే ప్రతి అణువు నీ రూపమే
                                                           సాయి మేమంతా నీ పాద దాసులమే కదా! "షి"
                                                            పశువులతో నీ సావాసం పక్షులతో నీ భాషణం
                                              పంచభూతములు నీ స్వాధీనం కలియుగమందున వెలసిన దైవం "షి"
                                                                                                                               

Wednesday, 18 January 2017

రాలిపోనీకండి

                                                                                  ఏ చిన్నశబ్దం రాకుండా పుల్ల కూడా విరగదు.చివరకు ఆకు రాలినా భూమి మీద రాలినప్పుడు శబ్దం వస్తుంది.ఏమాత్రం అశ్రద్ధ,నిర్లక్ష్యంగా ఉన్నట్లనిపించినా బయటకు కూడా తెలియకుండానే మనసులు విరిగిపోయి బంధాలు తెగిపోతాయి.ఇవి చాలా చాలా సున్నితమైనవి కనుక వీటిని జాగ్రత్తగా కాపాడుకోవాలి.అవేమిటంటే అనుబంధాలు,ఆప్యాయతలు వాగ్దానం ఇచ్చి నిలుపుకోలేకపోవడం లబ్ది పొంది కనీస కృతజ్ఞత లేకుండా వెన్నుపోటు పొడవడం ఇవి మనసుకు  కష్టం కలిగించి  ఏ మాత్రం శబ్ధం రాకుండా అనుబంధాలు,ఆప్యాయతలు పుటుక్కున తెగిపోయి అవి  కృత్రిమంగా తయారయ్యే  ప్రమాదం ఉంది.ఏ కొంచెం తేడా వచ్చినా హృదయ పూర్వకంగా ప్రేమతో కూడిన మాటలు రాకుండా పెదవుల చివర నుండి పైపై  మాటలు వచ్చేస్తాయి. అందుకే జీవితంలో వీటిని ఎప్పటికీ రాలిపోనీకండి.          

Tuesday, 17 January 2017

సెల్ఫీ వ్యసనం

                                                                                  సెల్ఫీ కూడా ఒక వ్యసనమే అన్న విషయం చాలా మందికి తెలియకుండానే దానికి బానిస అయిపోతున్నారు.చిన్నాపెద్ద అనే తేడా లేకుండా ఈ వ్యసనం బారిన పడుతున్నారు. కాలు లోపల పెడితే సెల్ఫీ,కాలు బయట పెడితే సెల్ఫీ.బస్సు,రైలు ఎక్కుతుంటే దిగుతుంటే సెల్ఫీ.కాలుజారి క్రిందపడి ప్రమాదాలు,చనిపోవడాలు అంత అవసరమా?పిచ్చిగోల.దీనికి తోడు ప్రతిదాన్నిముఖ పుస్తకం లాంటి సోషల్ నెట్ వర్కింగ్ సైట్లలో పెట్టడం ఎదుటివాళ్ళు నచ్చినా నచ్చకపోయినా లైక్ పెట్టాలని ఎదురు చూడడం నేడు పరిపాటి అయిపోయింది.పెట్టకపోతే దిగులు పడటం,పదేపదే చరవాణి వైపు చూస్తూ నిరుత్సాహ పడుతూ భోజనం సరిగా చేయకపోవడం,ఒత్తిడి,ఆందోళన పడుతూ నానా ఇబ్బందులు పడుతున్నారు.ఈ సెల్ఫీపిచ్చి అనే వ్యసనం వల్ల ఎంతో మంది మానసిక వ్యాధుల బారిన పడుతున్నారు.ఈ సెల్ఫీ వ్యసనం నుండి ఎంత త్వరగా బయట పడగలిగితే అంత మంచిది.దీని నుండి బయట పడలేకపోతే మానసిక వైద్యులను సంప్రదించే పరిస్థితి వస్తుంది.తస్మాత్ జాగ్రత్త.

Sunday, 15 January 2017

సాయి రాముని పూజించండి

                                                                               ఓం సాయి రాం                                                                            అందరి దైవం అన్ని రూపాలు ఒకటే అంటూ వ్రాసుకున్న జయంతమ్మ సాయి సంకీర్తనా కుసుమం
                                                 సాయి రాముని పూజించండి సాయి కృష్ణుని సేవించండి
                                                  సాయి భజనలు చేద్దాం రండి బాబా క్రుపను పొందండి "సా"
                                                          తల్లిదండ్రులను పూజిద్దాంపెద్దలందరినీ సేవిద్దాం                    
                                                           తోటివారినీ ప్రేమిద్దాం సాయి సేవకులమనిపిద్దాం "సా"
                                                            ఈర్ష్యాద్వేషం వదలండీ మనమంతా ఒకటేనండీ
                                                          కులమత బేధం వదలండీ కలసిమెలసి ఉండండీ"సా"
                                                           సత్సంగాలు చేయండీ సాయి బాటలో నడవండీ
                                                     నవవిధ భక్తుల స్వామిని కొలిచి ముక్తి మార్గము పొందండి "సా"
                                                      అందరి దైవం ఒకడేనండీ అన్ని రూపాలు ఒకటేనండీ
                                                      తల్లి  తండ్రి గురువు దైవం తోడు నీడ సాయేనండీ "సా"

Saturday, 14 January 2017

మనసుకు రీచార్జ్

                                                    చరవాణికి రీచార్జ్ ఉంటుంది కానీ ఈ మనసుకు రీచార్జ్ ఏమిటి అనుకుంటున్నారా?ఇది నిజం.జీవితం చాలా చిన్నది.ఆ చిన్ని జీవితంలో మనం సంతోషంగా ఉంటూ మన చుట్టూ ఉన్నవాళ్ళను కూడా సంతోషంగా ఉండేలా చూడగలగటం గొప్పతనం.ఇందులో అద్వైతలా ఎవరు ప్రయత్నించినా నిస్సారంగా అనిపించిన జీవితం మధురంగా అనిపిస్తుంది.అద్వైత చిన్ననాటి నుండి ఎంతో సంతోషంగా కిలకిలా నవ్వుతూ చూడగానే ఎత్తుకోవాలని అనిపించేలా ఉండేది.చిన్నప్పుడంటే చీకు చింత ఉండదు.కానీ వయసు మీద పడినా కూడా ముఖంపై అదే  చెరగని చిరునవ్వుతో చురుకుగా,హుందాగా,చూడగానే ఒక విధమైన ప్రశాంతతో ఉంటుంది.ఎంత కోపము,చిరాకులో ఉన్నవాళ్ళనయినా ఆమెను చూడగానే ఆమె మృదువైన మాటలు వినగానే సంతోషంగా అంతకు ముందు ఉన్న చిరాకు కోపం తగ్గి ప్రశాంతంగా అయిపోతారు.అందరికీ సలహాలు చెప్పి ఎదుటివాళ్ళ సమస్యలు తీర్చేఅద్వైత ఎందుకో ఈమధ్య నిస్సంతోషంగా,నిరాశ,నిస్పృహలతో ఉన్నట్లు ముఖంపై చిరునవ్వు అనేది లేకుండా కనిపిస్తోంది.అద్వైతకు వచ్చిన కష్టం ఏమీ లేదు.అయినా ఎందుకు అలా ఉంటుందో ఎవరికీ అర్ధం కాక తలలు బద్దలు కొట్టుకుని ఎప్పుడూ నవ్వుతూ సంతోషంగా ఉండే దానివి ఆ నాటి నవ్వులు ఏవమ్మా?అంటూ కుటుంబసభ్యులు,స్నేహితులు,బంధువులు సరదాగా ఆట  పట్టించడం మొదలు పెట్టారు.అవును నిజంగానే ఎందుకు ఇలా తయారయ్యాను అని తనను తాను ప్రశ్నించుకుని సంతోషం అనేది మనసు బట్టే ఉంటుంది కదా!ఎంత త్వరగా మనసుకు రీచార్జ్ చేసుకుంటే అంత మంచిది అనుకుంది. అనుకున్నదే తడవుగా అద్వైత తోటలో ఒంటరిగా ప్రశాంతంగా కూర్చుని తన జీవితంలో సంభవించిన చిన్ననాటి నుండి నిన్న మొన్నటివరకు ఉన్న మధుర జ్ఞాపకాలను ఒక్కొక్కటి నెమరవేసుకుంటూ ఆమె  మనసును రీచార్జ్ చేసుకుని మళ్ళీ పూర్వపు అద్వైతలా చలాకీగా మారిపోయింది. 

శ్రీ సాయి సన్నిధి

                                                                       శ్రీ సాయి రాం
                    సాయి సన్నిధే మాకు పెన్నిధి అంటూ వ్రాసుకున్న జయంతమ్మ సాయినాధ సంకీర్తనా కుసుమం 
                                                          శ్రీ సాయి సన్నిధి అదే మాకు పెన్నిధి
                                                    కరుణించే దైవమె మన కనుల ముందు ఉన్నది " శ్రీ"
                                                            నీవే మాకు తల్లివి నీవే మాకు తండ్రివి                    
                                                          మేమంతా నీ బిడ్డలమై నీ చెంతనే చేరితిమి
                                                            ఆపదలో ఆనందములో నీ శరణు కోరితిమి  "శ్రీ"
                                                                    రాముడైననీవే కృష్ణుడైన నీవే
                                                              ఆ పాల కడలిని విడిచి షిరిడీలో చేరితివి
                                                             ఎన్ని జన్మలైన గానీ నీవే మా దేవుడివి "శ్రీ"

Thursday, 12 January 2017

సంక్రాంతి శుభాకాంక్షలు

                                                                                        నా బ్లాగ్ వీక్షకులకు,తోటి బ్లాగర్లకు,ఏదేశంలో ఉన్నా మన తెలుగువారందరికీ భోగి,మకర సంక్రాంతి,కనుమ శుభాకాంక్షలు.అందరూ భోగ భాగ్యాలతో ఆయురారోగ్య ఐశ్వర్యాలతో,ఆనందోత్సాహాలతో సంక్రాంతి పండుగ జరుపుకోవాలని,అదే పల్లెల్లో అయితే సమృద్ధిగా పాడిపంటలతో కుటుంబ సభ్యులు,పిల్లాపాపలతో సుఖంగా,సంతోషంగా ఇల్లంతా కళకళలాడుతూ, సరదాగా సందడిగా పండుగ చేసుకోవాలని మనస్పూర్తిగా కోరుకుంటున్నాను.

Tuesday, 10 January 2017

పెద్దాయనను తప్పించబోయి ఫోటోలోనికి

                                                        చిన్నూ, బన్నూ చిన్నప్పటి నుండి అన్నదమ్ముల్లా కాకుండా స్నేహితుల్లా ఉండేవారు.చిన్నూ ఏపని చేస్తే బన్నూ ఆపని చేసేవాడు.చిన్నూ పై చదువులకు విదేశాలకు వెళ్ళాడు.బన్నూ కూడా ఇంజినీరింగ్ ఆఖరి సంవత్సరం చదువుతూ విదేశాలకు వెళ్ళే ప్రయత్నాల్లో ఉన్నాడు.అందులో భాగంగా ఒక పేపరు తెచ్చుకోవాలని హడావిడిగా వెళ్తూ శిరస్త్రాణం మర్చిపోయాడు.దారిలో ఒక పెద్దాయన రోడ్డు దాటుతూ ఇటు వస్తే ఇటు
అటు వెళ్తే అటు అడ్డుపడేసరికి పెద్దాయనను తప్పించబోయి డివైడర్ కు తగిలి క్రిందపడి పోయాడు.అప్పటికప్పుడు
తల పగిలి రక్తపు మడుగులోనే వెంటనే కోమాలోకి వెళ్ళి నిమిషాలలో ప్రాణం పోయింది.కన్ను మూసి కన్ను తెరిచేంతలో కళ్ళెదుట జరిగిన సంఘటన చూచి ఎవరి బిడ్డో పెద్దాయనను తప్పించడం మంచిపనే అయినా తన ప్రాణాన్ని ఫణంగా పెట్టాడు అంటూ కన్నీళ్ళ పర్యంతమయ్యారు.చిన్నప్పటి నుండి చిన్నూఅల్లరి చేసినా బన్నూ మాత్రం నిశ్శబ్దంగా ఉండేవాడు.అందరికీ తలలో నాలుకలా ఉండే బన్నూ మన అందరి మధ్య  లేడు అన్న విషయాన్ని స్నేహితులు,బంధువులు జీర్ణించుకోలేకపోతున్నారు. బన్నూ తల్లిదండ్రుల బాధ వర్ణనాతీతం.ఆలోటు ఎవరూ పూడ్చలేనిది.ఇంటికి పరామర్శించడానికి వచ్చిన బన్నూ స్నేహితుడి తల్లి మమ్మల్ని తీసుకెళ్ళు దేముడో!అని ఎదురు చూచే ముసలా ముతక బోలెడు మంది  ఉండగా బాగున్నచిన్న పిల్లాడ్ని తీసుకెళ్ళి ఫోటోలోనికి ఎక్కించడం ఏమిటి?దేముడికి దయలేదు.పూజలు చేయించుకుని నివేదనలు పెట్టించుకోవడం తెలుసుగానీ అంటూ శాపనార్ధాలు పెడుతుంటే మిగిలినవాళ్ళు బిత్తరపోయారు.

కదిలింది శ్రీ సాయి సైన్యం

                                                                     ఓం శ్రీ సాయి రాం        
   ఆర్తులకు చేతనైన సహాయం చేయుచు సాయి కృపకు పాత్రులు కమ్మని చెప్పే జయంతమ్మ సాయినాధ సంకీర్తన
                                                             కదిలింది కదిలింది శ్రీ సాయి సైన్యం
                                                             సాయి దండులో చేరి చేయండి సాయం   "క"
                                                                  రామకార్యనికై రామ దండు వలె
                                                                  సాయి బాటలో సాగిపోతున్నారు    "క"
                                                               కులమతమ్ములతో మాకు పని లేదంటూ
                                                                   ఆర్తులందరికీ వారు ఆకలిని తీర్చారు      "క"
                                                                   ఆడ పిల్లలు అంతా మా బిడ్డలేనంటు
                                                                         బీద బిక్కికి పెళ్ళిళ్ళు చేశారు     "క"
                                                                     ధనకనకమ్ములలో ఏమున్నదంటు
                                                                  ఆత్మసౌందర్యముతో అలరారుచున్నారు "క"
                                                                   గురుబోధలోనే గురుతెరిగి నడుచుచూ
                                                                   శ్రీ సాయి కృపను తృప్తిగా పొందారు  "క"
                                                                 
                                                       
                                                                     

Friday, 6 January 2017

శుభహారతి

                                                                  శ్రీ సాయి రాం
                                             భక్తినే మాలగా కట్టిన జయంతమ్మ మది హారతి
                                                         మా షిరిడీ సాయికి శుభహారతి
                                                         జగమేలు సాయికి జయహరతి "మా"
                                                         మదినేలు సాయికి మల్లెల హారతి
                                                         మా కన్న తండ్రికి కర్పూర హారతి "మా"
                                                         గుడిలో(ని)సాయికిదే గులాబీ హారతి
                                                         మా సద్గురువుకిదే సంపెంగ హారతి "మా"
                                                         మా చక్కని సాయికి చామంతి హారతి
                                                         మా సాయి లీలలకు లిల్లీల హారతి  "మా"
                                                         పద్మ దళాక్షునికిదే పద్మాల హారతి
                                                         భక్తినే మాలగా కట్టిన మా మదిహారతి "మా"
                                                         

Thursday, 5 January 2017

పూర్ణచంద్రునిమోము

                                                                జై శ్రీ సాయిరాం
                      జయంతమ్మ సాయి నీ నగుమోము పూర్ణచంద్రునిమోము అంటున్న సాయి సంకీర్తన
                                         పూర్ణచంద్రునిమోము పున్నమి వెన్నెల నవ్వు
                                         సూర్య తేజము నీది సురలకు ప్రభువు    "పూ"
                                         అసురగుణములు త్రుంచి అభయ హస్తము చూపి
                                         ఆపదలు బాపి మము ఆదుకొనుచున్నావు   "పూ"
                                          అండగా నీ ఉండ నరకబాధలు ఏల        
                                          ఇలయె ఇక స్వర్గమై విలసిల్లదా ఎపుడూ "పూ"
                                           కాషాయమును గట్టి సాధు రూపము దాల్చి
                                           యోగిలా అగుపించు పురుషోత్తమా      "పూ"
                                           ఫకీరువు కావు పరమాత్మవే నీవు
                                           ప్రణతి ప్రణతి సాయి నీ పాదపద్మములకు   "పూ"
          

Tuesday, 3 January 2017

భజన చేయరా

                                                                 శ్రీ సాయి జై సాయి జైజై సాయిరాం
జయంతమ్మ గారు మత్తు వదలరా నిద్రమత్తు వదలరా బాబా భజన చేయరా అంటూ వ్రాసుకున్న సంకీర్తనా కుసుమం  
                                                 భజన చేయరా బాబా భజన చేయరా    2
                                                 భక్తితో భజనలు చేసిన బాధలన్నీ తొలగునురా     "భ"
                                                 అణువణువున తానే బ్రహ్మాండము తానే
                                                 ఆది మధ్య అంతము లేని సృష్టికర్త తానే               "భ"
                                                 ఉదయాన అభిషేకాలు మధ్యాహ్న హారతులు
                                                 రాత్రివేళ లాలిపాటలతో ఆ స్వామిని సేవించుమురా
                                                 భక్తుల హృదయాలలోనే భగవంతుడు నివసించునురా
                                                  ఈ సత్యము ఎరిగిననాడు అంతటా అగుపించునురా   "భ" 

గతిలేక

                                                                 సరస్వతమ్మ గారికి ఒంట్లో బాగోలేదని బంధువుల ఆసుపత్రికి వెళితే వైద్యులు అన్ని పరీక్షలు చేద్దాము రెండు రోజులు ఆసుపత్రిలో ఉండమని చెప్పారు.సరేలే ఉదయాన పరగడుపున చేసే పరిక్షలు ఉంటాయి కదా!అని ఆసుపత్రిలో ఉన్నారు.బంధువులు కనుక ఒక మంచి గది ఇచ్చి రోగులకు రోజూ  వేడివేడిగా  భోజనం సిద్ధం చేస్తారు కనుక సరస్వతమ్మ గారికి,ఆమె భర్తకు కూడా అన్ని ఏర్పాట్లు చేశారు.వైద్యులు అన్ని రకాల పరిక్షలు చేసి అంత బాగానే ఉంది కానీ కొద్దిగా నీరసంగా ఉన్నారు కనుక నాలుగు రోజులు విశ్రాంతి తీసుకోమని చెప్పారు.ఆసుపత్రిలో పనిచేసే ఆమెను నాలుగు రోజులు ఇంటికి వచ్చి సహాయం చేయమని అడిగితే వచ్చింది.ఆమెకు కాస్త నోటి దురుసు.సరస్వతమ్మ గారి ఇంటికి వచ్చి కంచాలు,గ్లాసులు కూడా వేడి నీళ్ళతో కడిగే యంత్రంలో పెట్టి తీస్తున్నారు.ఇంట్లో ఇంత శుభ్రంగా ఉండి ఆసుపత్రిలో ఉన్నప్పుడు అక్కడి భోజనం చేశారు.గతిలేక ఎవరూ భోజనం పంపే దిక్కులేక తిని ఉంటారు అనేసి సరస్వతమ్మ గారు వచ్చేసరికి మనసులో అనుకునే మాట పైకే అనేశానని నాలుక కరుచుకుంది.

Sunday, 1 January 2017

పబ్బం

                                                                    వంశీ కృష్ణ ఏకాస్త సమయం దొరికినా రెండు రాష్ట్రాల మధ్య బొంగరంలా తిరుగుతుంటాడు.ఇంతకు ముందు ఒక్కడే తిరిగేవాడు.ఇప్పుడు కుటుంబం మొత్తాన్ని వెంటేసుకుని తిరగటం మొదలెట్టాడు.తన డబ్బు ఖర్చు అవకుండా ఎవరో ఒకరి ఇంటి మీద కాకి మాదిరిగా వాలిపోతుంటాడు.కొద్ది పరిచయం ఉన్నా వెళ్తుంటాడు.ఒకటి రెండు సార్లు అయితే  ఫర్వాలేదు.నలుగురం వస్తున్నామని చెప్పి పది మందిని వెంట తీసుకుని పెళ్లిళ్లకు,పేరంటాలకు వస్తుంటాడు.పోనీ ఇన్నిసార్లు ఎదుటి వాళ్ళింటికి వెళ్ళి వాళ్ళను ఇబ్బంది పెడుతున్నామని కొంచెం కూడా ఇంగిత జ్ఞానం ఉండదు.పైగా ఒకచోటు నుండి ఇంకొకచోటుకు వచ్చేదారిలో ఏమైనా తింటే డబ్బు దండుగ అని ఎక్కడా ఆగకుండా కారులో రావటం వంశీ కృష్ణ మధ్యలో దిగి మిగతావాళ్ళను పంపటం ఆ వచ్చిన వాళ్ళు  రాగానే అంత మందికి భోజన ఏర్పాట్లు ఒక్కరే చెయ్యడం కష్టం అనే ఆలోచన లేకుండా ఆకలి ఆకలి అంటూ 11 గం.లకే భోజనం పెట్టమనడం పెద్ద తలనొప్పి.మేము ఆ కూర తినము ఈ కూర తినము అంటూ విసిగించడం తినేసి హాయిగా ఏ.సి వేసుకుని పడుకోవడం లేచి కాఫీ కావాలని ఒకళ్ళు టీ కావాలని ఒకళ్ళు పీక్కుని తినడం వీళ్ళందరికీ చాకిరీ చేయలేక చేసి ఈ తలనొప్పితో ఇంటి ఆమె పెళ్ళికి వెళ్ళలేకపోవడం అవేమీ తనకు సంబంధం లేనట్లు తన పబ్బం గడిస్తే చాలన్నట్లు తన పరివారాన్ని వెంటేసుకుని వెళ్ళిపోవడం గొప్పగా భావిస్తుంటాడు.తన గొప్ప ఏమో గానీ ఎదుటివాళ్ళ మనసులో భావన (చులకన) ఏంటో?వంశీ కృష్ణకు అనవసరం.