ఓటమి - విజయం

                                                           మనము జీవితంలో అనుకున్న పని సాధించలేనప్పుడు ఓడిపోయాము అని బాధపడుతూ ఉంటాము. కానీ జీవితము అనే ప్రయాణములో ఓటమి ముగింపు ఎప్పటికీ కాదు.ఇంకా ముందుముందు మరెన్నో నేర్చుకోవడానికి ఒక అవకాశం మాత్రమే. ఓటమి ఒక పాఠం అనుకుని ఇంకా పట్టుదలతో ముందుకు సాగాలి. ఇంకా ఎన్నో విజయాలను సాధించి అనుకున్న లక్ష్యం చేరుకోవాలి.అప్పుడు అంతులేని ఆనందం మన స్వంతం అవుతుంది.

పెన్సిలు - రబ్బరు

                                                     మనము ఒకరు సంతోషంగా ఉంటే వారి ఆనందాలను గురించి  వ్రాయడానికి పెన్సిలు కాకపోవచ్చు కానీ మనము ఒకరు బాధ పడుతుంటే వారి దుఃఖాన్ని తొలగించడానికి రబ్బరు (ఎరేజరు ) లాగా ఉపయోగపడవచ్చు.మీరూ ఒకసారి ఆలోచించండి. ధన్యవాదములు.

అవసరవాదులు

                                                    మనకు అన్నీ ఉన్నప్పుడు అందరూ మన చుట్టూ ఉంటూ మనతో అధిక ప్రేమగా మాట్లాడుతూ ఉంటారు. బెల్లం చుట్టూ చేరిన ఈగల్లా మన చుట్టూ తిరుగుతూ ఉంటారు. కానీ మనకు ఏదైనా అవసరం అనుకుంటే ఒక్కరు కూడా మన దరిదాపుల్లో ఉండరు.మన నుండి ఎంతో సహాయం పొందిన వాళ్ళు కూడా తన,పర అనే బేధం లేకుండా ముఖం చాటేస్తూ ఉంటారు.మనం ఎవరో తెలియకపోయినా సహాయం చేయడానికి వచ్ఛే వాళ్ళు కొంత మంది ఉంటారు.ఈరోజుల్లో ఎక్కువగా అవసరవాదులే ఉంటున్నారు. వాళ్లకు అవసరం అయినప్పుడు తియ్యగా మాట్లాడుతారు. అవసరం తీరిపోయాక మనం ఎవరో తెలియనట్లు నటిస్తుంటారు.ఇటువంటి వాళ్ళతో చాలా జాగ్రత్తగా ఉండాలి.ఎవరితో ఎంతవరకు ఉండాలో అంతవరకు ఉండడం నేర్చుకోవాలి.అందరిని గుడ్డిగా నమ్మేసి మోసపోకుండా జాగ్రత్తగా ఉంటే ధన పరంగా నష్టపోకుండా ఉండడంతోపాటు, మానసిక ప్రశాంతతను కోల్పోకుండా ఉంటాము. అవసరవాదులతో తస్మాత్ జాగ్రత్త.

ఆత్మ సంతృప్తి

                                       జీవితం అంటే వడ్డీంచిన విస్తరి కాదు.ప్రతి ఒక్కరికి ఏదో ఒక బాధ చిన్నదో, పెద్దదో ఎంత చెట్టుకి అంత గాలి అన్నట్లు ఉంటూనే ఉంటుంది.గతంలో మంచి జ్ఞాపకాలు, చెడు జ్ఞాపకాలు కూడా ఉంటాయి.అది ఏవిధంగా ఉన్నా మనం గతంలో జీవించకూడదు.జీవించలేము కూడా.గతం గతః అన్నట్లు గతాన్ని ఒక పాఠంగా తీసుకుని వర్తమానంలో ఆనందంగా జీవిస్తూ భవిష్యత్తు గురించి చక్కగా ప్రణాళికాబద్ధంగా ఎవరికి వారే బంగారు బాట వేసుకోవాలి..అప్పుడు ఎవరి భవిష్యత్తు వారిచేతిలోనే ఉంటుంది.అంతే కాకుండా మనకి మనమే మన భవిష్యత్తుకి బంగారు బాట వేసుకున్నామనే ఆత్మ సంతృప్తి ఉంటుంది.

స్వామికార్యం స్వకార్యం

                                                పని చిన్నది అయినా పెద్దది అయినా పనే. పనిని మించిన దైవం మరొకటి లేదు.పని చేస్తూ ఉంటేనే శారీరక, మానసిక ఆరోగ్యం బాగుంటుంది. దీనితోపాటు సంతోషం, సంపద, పేరుప్రతిష్టలు వస్తాయి. మనం చేసే పనిలో భాగంగా ఎంతో కొంత సమాజానికి ఉపయోగపడే పనులు చేయగలిగితే మనసుకి ప్రశాంతంగా సంతోషంగా ఉంటుంది. ప్రతి ఒక్కరు తమ పనులు చేసుకుంటూనే సమాజానికి ఉపయోగపడే విధంగా తమకు చేతనైనంత వరకు సహాయం చేస్తుంటే మానసిక తృప్తితోపాటు ఆరోగ్యం, ఆనందం మన స్వంతం చేసుకోవచ్చు.అప్పుడు స్వామి కార్యం,స్వకార్యం రెండు మన స్వంతం అవుతాయి.

జీవితంలో ప్రశాంతంగా ఉండాలంటే

                                మనము ఎల్లప్పుడు ప్రశాంతంగా, సంతోషంగా ఉండాలంటే చెయ్యకూడని కొన్ని పనులు ఉన్నాయి. అవి ఏమిటంటే 1) చిన్న చిన్న విషయాలను కూడా పట్టించుకుని ఎక్కువగా అలోచించి మనసు పాడుచేసుకోకూడదు. 2) జీవితంలో వచ్ఛే మార్పులకు భయపడకూడదు. ఏదైనా ధైర్యంగా ఎదుర్కొనేలా ఉండాలి. 3) గతం మిగిల్చిన చేదు జ్ఞాపకాలతో జీవించకూడదు. వాటిని సాధ్యమైనంత వరకు మనసు నుండి తుడిచి వెయ్యాలి.4)మనల్ని మనమే తక్కువ చేసి చూచుకోకూడదు.ఆ విధంగా చేస్తే ప్రక్కవాళ్లకు మన గురించి మాట్లాడే అవకాశం ఇఛ్చినట్లు అవుతుంది. 5) ఎప్పుడూ కూడా ఎదుటివారి దగ్గర సహాయం కోసం చేతులు చాచకూడదు.మన పని మనమే చేసుకోవాలి.ఎవరో వఛ్చి ఏదో మనల్ని ఉద్దరిస్తారని ఆశించకూడదు.ఎదుటి వారికి లోకువగా ఉంటుంది. 6) డబ్బు ఉన్నప్పుడు అధిక ఖర్చులు చేయకూడదు. డబ్బును అవసరమైనంత  వరకు వాడుకుంటూ ఆపదలో  ఉన్నవారిని ఆదుకుంటూ డబ్బును గౌరవించడం నేర్చుకోవాలి. అప్పుడు డబ్బుకు ఇబ్బంది పడవలసిన అవసరం ఉండదు.పైన చెప్పినవి పాటిస్తూ హుందాగా ప్రవర్తించడం అలవాటు చేసుకున్నట్లయితే జీవితంలో ప్రశాంతంగా ఉంటాము.

మనకు అనవసరం

                                         ఈరోజుల్లో ఎదుటి వారిని విమర్శించేవారే ఎక్కువ కనుక నలుగురు మన గురించి ఏమనుకుంటున్నారో మనకు అనవసరం.ఎదుటివాళ్ళ మాటలు పట్టించుకుని సమయం వృధా చేసుకునేకన్నా మనకు నచ్చిన విధంగా బ్రతకడం,అవసరమైనవారికి మనకు తోచిన సహాయం చేయడం,సంతోషంగా జీవితాన్ని గడపడం అలవాటు చేసుకుంటే ప్రశాంతంగా ఉంటుంది.మనమేంటో మనకు తెలుసు కనుక ప్రతిదీ ఒకరికి చెప్పి నిరూపించుకోవలసిన అవసరం లేదు.