కొంగ్రొత్త వెలుగులు,శుభాకాంక్షలు

                                                              భోగ భాగ్యాలను ఇచ్చే భోగి ,సరదాను ఇచ్చే సంక్రాంతి, కమ్మని కనుమ మన అందరికీ  క్రొత్త సంవత్సరంలో కొంగ్రొత్త వెలుగులు నింపాలని,సంపూర్ణ ఆయురారోగ్య అష్టైశ్వర్యాలను సదా భగవంతుడు ప్రసాదించాలని,పాడి పంటలతో,ధన ధాన్యాలతో రైతులు అందరూ చల్లగా ఉండాలని,భోగిమంటలు,గంగిరెద్దులు,హరిదాసుల ఆటపాటలతో,ముంగిట రకరకాల రంగవల్లులతో గొబ్బెమ్మలతో,గుమ్మానికి మామిడి తోరణాలతో,గడపకు పసుపు కుంకుమలతో ,చెరుకు  గడలు,తేగలు,కమ్మని పిండి వంటల ఘుమఘుమలతో,సరదాగా,సంతోషంగా మన సంస్కృతి సంప్రదాయాలను పిల్లలకు తెలియచేస్తూ పెద్దలు,పిన్నలు ఆనందోత్సాహాలతో వారి వారి సంప్రదాయాన్ననుసరించి  పండుగ జరుపుకోవాలని,మనస్పూర్తిగా కోరుకుంటూ నా బ్లాగ్ వీక్షకులకు,చదువరులకు సంక్రాంతి,కనుమ,ముక్కనుమ శుభాకాంక్షలు తెలియచేస్తున్నాను.   

                                   

                                                       

                          

                                            సర్వేజనా సుఖినోభవంతు 

                                                          

 

కోతికి ధన్యవాదాలు

                                                                              సరస్వతి చిన్ననాటి స్నేహితురాళ్ళతో కలిసి ఒక వారం రోజులు విహార యాత్రలకు వెళ్ళింది.ఆ నేపధ్యంలో దేవాలయంలో దర్శనం చేసుకున్న తర్వాత అందరూ ఒకచోట కూర్చున్నారు.అక్కడ కోతులు బాగా ఉన్నాయి.ఒక కోతి అందరికన్నా వెనుకగా కూర్చున్న ఆమె దగ్గరకు వచ్చి చేతికి తగిలించుకున్న సంచిపై చెయ్యి వేసి ఇవ్వమని సైగ చేస్తుంటే కోతి  ఎక్కడ తన సంచి పడేస్తుందో అన్న భయంతో ఇవ్వకుండా ఆమె నా దగ్గర ఏమీ లేవమ్మా!అని పదేపదే మాట్లాడుతుంటే ముందు కూర్చున్న వాళ్ళకి అర్ధం కాలేదు.వెనక్కి తిరిగి చూసేసరికి కోతి సంచి పట్టుకుని ఇవ్వమని భీష్మించుకుని కూర్చుంది.అందరూ సంచి ఇవ్వమనేసరికి ఆమె ఇచ్చేసింది.కోతి వైనంగా సంచిని తెరచి అందులో ఉన్నడబ్బు,చరవాణి తీసి పక్కన పడేసింది.ఆహారం కోసమో ఏమో?సంచి మొత్తం వెతికి ఏమీ లేకపోయేసరికి అక్కడ పడేసి వెళ్ళిపోయింది.సరస్వతి స్నేహితురాలు బ్రతుకు  జీవుడా!అనుకుంటూ తనను,తన సంచిని ఏమీ చేయనందుకు కోతికి ధన్యవాదాలు చెప్పింది.

పప్పీ భోజనాలు

                                                         రోహిణి ఇంటినిండా బంధువులు.నిమిషం తీరిక లేదు.అసలే ఆదివారం.వంట ఇంటి నిండా గిన్నెలు.పనిమనిషి లక్ష్మి ఎగనామం.తాపీగా తర్వాత రోజు ఉదయం పనికి వచ్చింది.లక్ష్మీ చుట్టాలు వస్తారని తెలుసు కదా!నిన్నంతా పనికి రాలేదే?అని అడిగితే వద్దామనే అనుకున్నాను అమ్మా! కొద్ది దూరం రాగానే మావాళ్ళందరు రాములోరి కళ్యాణం జరిగింది కదా!అక్కడ పప్పీ భోజనాలు పెడుతున్నారు వెళదాం రమ్మని తీసుకుని వెళ్లారు.అక్కడ చాలామంది ఉండటంతో ఆలస్యం అయిపోయింది అందుకే రాలేకపోయాను అని చెప్పింది.కొత్తగా ఈ పప్పీ భోజనాలు ఏంటి?అంటే టేబులు,కుర్చీలు వేసి పెట్టే భోజనాలని మేము పప్పీ భోజనాలు అంటాము అని చెప్పింది.నిలబడి తినాలంటే కష్టం కదమ్మా అందుకే పప్పీ భోజనాలనగానే నేను కూడా వెళ్ళాను.నిమిషంలో పని అంతా చక్కబెట్టేస్తాను.మీరు కంగారు పడకండి అని తేలిగ్గా చెప్పేసింది.రోహిణి కూడా లక్ష్మి చెప్పిన తీరుకి నవ్వుకుంటూ హాయిగా ఊపిరి పీల్చుకుంది.  

పుల్ల ఐసు

                                                                           మనలో చాలామంది పుల్ల ఐసు అంటే ఇష్టపడనివారు అంటూ ఉండరు.తులసికి అయితే చెప్పలేనంత ఇష్టం.తులసి అంటే నలుగురు మగపిల్లల తర్వాత లేకలేక ఆడపిల్ల పుట్టిందని తల్లిదండ్రులతోపాటు అన్నదమ్ములకు కూడా చెల్లెలంటే ప్రాణం.అన్నలతో పాటు వాళ్ళ భార్యలకు కూడా ఆడపడుచు అంటే మహా ఇష్టం.స్వగ్రామానికి వెళ్ళినప్పుడల్లా ఆడపడుచుకు ఒంట్లో వేడిని హరించి శరీరాన్ని చల్లబరిచే  సబ్జా గింజలు చల్లిన పుల్ల ఐసు అంటే మరీ ఇష్టమని పక్క ఊరినుండి ప్రత్యేకంగా తెప్పిస్తూ ఉంటారు.తులసితోపాటు ఒదినలు ఇరుగు పొరుగు అందరూ అరమరికలు లేకుండా కబుర్లు చెప్పుకుంటూ నీరు కారిపోకుండా మధ్యమధ్యలో పుల్ల ఐసు నోట్లో పెట్టి ఆ ఐసు గొంతు దిగుతుంటే శరీరమంతా చల్లచల్లగా అయిపోతుంటే ఎంతో హాయిగా వేసవి సాయంకాలాలు గడిపేస్తూ ఉంటారు.పుల్ల ఐసు అంటే ఇష్టమైన వాళ్ళకు మాత్రమే ఆ రుచి అందులో ఉండే మజా తెలుస్తుంది.   

కత్తి తెచ్చిన తంటా

                                                                   అచ్చమ్మ,లచ్చమ్మ అక్కచెల్లెళ్ళు.వీళ్ళిద్దరి ఇంటి పక్కనే యాదమ్మ నివాసం.ఒక రోజు అచ్చమ్మ యాదమ్మ వద్ద కట్టెలు కొట్టే కత్తి తీసుకుని ఎన్నిరోజులైనా తిరిగి ఇవ్వకపోవడంతో యాదమ్మ వెళ్ళి కత్తి తిరిగి ఇవ్వమని అడిగింది.కత్తి తిరిగి ఇవ్వకపోగా నేను తిరిగి ఇచ్చేవరకు నువ్వు ఆగకుండా నన్ను అడగటం ఏమిటి?అంటూ పోట్లాడటం మొదలెట్టింది.ఇంతలో లచ్చమ్మ అక్కకు వంత పాడుతూ గొడవకు దిగింది.మాటా మాటా పెరిగి అచ్చమ్మ,లచ్చమ్మ కలిసి యాదమ్మను పెద్ద వయసు అనికూడా చూడకుండా విపరీతంగా కొట్టారు.అర్ధరాత్రి కనుక చుట్టుపక్కల వాళ్ళకు అందరికీ తెలియదు.కత్తి తీసుకుని తిరిగి ఇవ్వకపోగా కొట్టారని ఉదయానే అక్కాచెల్లెళ్ళపై యాదమ్మ కేసు పెట్టింది.పోలీసులు వచ్చి అక్కాచెల్లెళ్ళను స్టేషనుకు తీసుకుని వెళ్ళారు.ఏమి జరిగిందో అర్ధం కాక చుట్టుపక్కల వాళ్ళు వచ్చి కత్తికోసం కుస్తీ పట్లు పట్టి స్టేషనుకు వెళ్ళేవరకు వచ్చిన వ్యవహారాన్నితెలుసుకుని కత్తి తెచ్చిన తంటా ఇదంతా అనుకుంటూ ఎవరి ఇళ్ళకు వాళ్ళు నెమ్మదిగా జారుకున్నారు. 

మతిమరుపు

                                                                 మతిమరుపు మనుషులకు వస్తుందని తెలుసు కానీ విద్యుత్తుతో పని చేసే వస్తువులకు కూడా వస్తుందని సుచిత్రకు ఈమధ్యనే తెలిసింది.సుచిత్ర ఇంటిలో మైక్రో వేవ్ ఎన్ని ని.లు అమర్చి పెట్టినా ఒక ని.పని చేసి ఆగిపోవటం మొదలు పెట్టింది.మైక్రో వేవ్ రిపేరు చేసే అతన్ని పిలిస్తే మొత్తం తీసి చూచి అమ్మా దీనికి (మెమరీ  లాస్) మతిమరుపు వచ్చింది అని చెప్పాడు.సుచిత్ర మైక్రో వేవ్ కి మతిమరుపు రావటం ఏమిటి?విడ్డూరంగా అనేసరికి అవునమ్మా!దీనిలో ఒక పానెల్ ఉంటుంది.దానిలో ఒక భాగం పోయింది అందువల్ల అలా జరుగుతుంది.వందలో ఒకదానికి మాత్రమే ఇలా జరుగుతుంది.ఒకవేళ ఆ భాగం తెచ్చి వేసినా కూడా పనిచేస్తే   చెయ్యొచ్చు లేకపోతే లేదు.అని విపులంగా చెప్పాడు.సుచిత్ర అయ్యో రామచంద్రా!పాతిక వేలు పోసి నిన్న గాక మొన్న కోన్నానే అంటూ  తెగ బాధ పడి పోయింది  

మనసులో నవ్వు

                                                            దోమలకు ధనిక,పేద అనే తారతమ్యం ఉండదు.మంత్రి అయినా రిక్షావాలా అయినా ఒకటే.దానికి కావలసిందల్లా ఎవరో ఒకరి రక్తం.ఎవరిలోనయినా ప్రవహించేది ఒకే రక్తం కనుక అది అందరినీ కాటు వేస్తుంది.ఇబ్బందుల పాలు చేస్తుంది.మొన్నామధ్య ఒక రాజకీయ నాయకుడు తన కొడుకు పెళ్ళికి మంత్రి గారిని ఆహ్వానించడానికి  భార్యా సమేతంగా వెళ్ళాడు.మంత్రిగారు వచ్చేవరకు కొంత సమయం వేచి ఉండవలసి వచ్చింది.కార్యాలయం ఎంత శుభ్రంగా ఉన్నా కూడా అక్కడక్కడ దోమలు ఎగురుతున్నాయి.మాటిమాటికి అవి చుట్టూ ఎగురుతూ అక్కడ కూర్చున్నవారిని కుట్టడానికి ప్రయత్నిస్తున్నాయి.ఈ దోమలకు సామాన్య మానవుడు అయినా మంత్రి అయినా తారతమ్యం తెలియదు కదా!అని ఆహ్వాన పత్రిక ఇవ్వడానికి వెళ్ళిన ఆమె మనసులో నవ్వుకుంది.  

పెద్దాయనను తప్పించబోయి ఫోటోలోనికి

                                                        చిన్నూ, బన్నూ చిన్నప్పటి నుండి అన్నదమ్ముల్లా కాకుండా స్నేహితుల్లా ఉండేవారు.చిన్నూ ఏపని చేస్తే బన్నూ ఆపని చేసేవాడు.చిన్నూ పై చదువులకు విదేశాలకు వెళ్ళాడు.బన్నూ కూడా ఇంజినీరింగ్ ఆఖరి సంవత్సరం చదువుతూ విదేశాలకు వెళ్ళే ప్రయత్నాల్లో ఉన్నాడు.అందులో భాగంగా ఒక పేపరు తెచ్చుకోవాలని హడావిడిగా వెళ్తూ శిరస్త్రాణం మర్చిపోయాడు.దారిలో ఒక పెద్దాయన రోడ్డు దాటుతూ ఇటు వస్తే ఇటు

అటు వెళ్తే అటు అడ్డుపడేసరికి పెద్దాయనను తప్పించబోయి డివైడర్ కు తగిలి క్రిందపడి పోయాడు.అప్పటికప్పుడు

తల పగిలి రక్తపు మడుగులోనే వెంటనే కోమాలోకి వెళ్ళి నిమిషాలలో ప్రాణం పోయింది.కన్ను మూసి కన్ను తెరిచేంతలో కళ్ళెదుట జరిగిన సంఘటన చూచి ఎవరి బిడ్డో పెద్దాయనను తప్పించడం మంచిపనే అయినా తన ప్రాణాన్ని ఫణంగా పెట్టాడు అంటూ కన్నీళ్ళ పర్యంతమయ్యారు.చిన్నప్పటి నుండి చిన్నూఅల్లరి చేసినా బన్నూ మాత్రం నిశ్శబ్దంగా ఉండేవాడు.అందరికీ తలలో నాలుకలా ఉండే బన్నూ మన అందరి మధ్య  లేడు అన్న విషయాన్ని స్నేహితులు,బంధువులు జీర్ణించుకోలేకపోతున్నారు. బన్నూ తల్లిదండ్రుల బాధ వర్ణనాతీతం.ఆలోటు ఎవరూ పూడ్చలేనిది.ఇంటికి పరామర్శించడానికి వచ్చిన బన్నూ స్నేహితుడి తల్లి మమ్మల్ని తీసుకెళ్ళు దేముడో!అని ఎదురు చూచే ముసలా ముతక బోలెడు మంది  ఉండగా బాగున్నచిన్న పిల్లాడ్ని తీసుకెళ్ళి ఫోటోలోనికి ఎక్కించడం ఏమిటి?దేముడికి దయలేదు.పూజలు చేయించుకుని నివేదనలు పెట్టించుకోవడం తెలుసుగానీ అంటూ శాపనార్ధాలు పెడుతుంటే మిగిలినవాళ్ళు బిత్తరపోయారు.

మొలకలు వస్తే .....

                                                    ఉల్లి,వెల్లుల్లి పాయలకు మొలకలు వస్తే వాటిలో సారం ఉండదని పైగా వాటిని తింటే కడుపులో నొప్పి వస్తుందని అపోహతో చెత్తలో పడేస్తూ ఉంటాము.లేత పాయలు,ముదిరిన పాయల కన్నా ఇలా మొలకలు వచ్చిన పాయల్లో గింజల మొలకల్లో ఉండే మెటాబొలైట్లు ఉన్నట్లు నిపుణులు చెబుతున్నారు.ఇవి అద్భుత యాంటీ ఆక్సిడెంట్లు మాదిరిగా పనిచేసి గుండెకు ఎంతో మేలు చేస్తాయని అంటున్నారు.మాములుగానే వెల్లుల్లి రోగ నిరోధక శక్తిని పెంచడంతోపాటు కొలెస్టరాల్,బి.పిని అదుపులో ఉంచుతుంది.తాజాగా ఉల్లి మధుమేహాన్ని అదుపులో ఉంచుతుందని చెబుతున్నారు.

గమనిక:ఉల్లి కాడలు ఆరోగ్యానికి ఎంతో మేలు చేయడమే కాక దేనిలో వేసినా రుచితో పాటు రకరకాల వంటలు చేసుకోవచ్చు.ఇష్టమైతే అవి నా పాత పోస్టుల్లో చూడవచ్చు.

వంటింటి గట్టు శుభ్రంగా.......

                                                              పిండి వంటలు చేసినప్పుడు వంటింటి గట్టు ఎంత శుభ్రంగా కడిగినా ఎంతో కొంత జిడ్డుగానే ఉన్నట్లు అనిపిస్తుంది.అటువంటప్పుడు కొంచెం రాళ్ల ఉప్పు,కొద్దిగా సోడా ఉప్పు,కొంచెం సర్ఫు కలిపి గట్టుపై చల్లి కొద్దిగా నీళ్ళు చల్లుతూ పీచుతో రుద్దాలి.ఎక్కువ శ్రమ పడకుండా తేలికగా జిడ్డు వదిలి వంటింటి గట్టు శుభ్రంగా ఉంటుంది.చీమలు కూడా రాకుండా ఉంటాయి. 

జర భద్రం

                                                 వర్షాకాలం వచ్చిందంటే చాలు తగిన జాగ్రత్తలు తీసుకోకపోతే రకరకాల వ్యాధులు వెన్నంటి వస్తాయి.వర్షాలు పడక ముందే ఇంటి చుట్టుపక్కల,ఇంట్లో బూజు,దుమ్ము,ధూళి లేకుండా శుభ్రం చేయాలి. శ్వాసకోశ సమస్యలు రాకుండా ఉంటాయి.వర్షం పడినప్పుడు ఇంటి బయట నీరు నిల్వ లేకుండా చూడాలి.దోమలు వృద్ధి చెందకుండా ఉంటాయి.వర్షం పడుతుంది కదా అని వేడివేడిగా కాఫీ,టీ ఎక్కువగా తీసుకోకుండా గోరువెచ్చటి నీరు తాగటం మంచిది.నీటి ద్వారా వ్యాపించే వ్యాధులు ఎక్కువ కనుక పరిశుభ్రమైన నీటిని వీలైతే కాచి చల్లార్చిన నీటిని రోజుకు కనీసం 8 గ్లాసులు తాగాలి.వర్షంలో తడవటం సరదాగా ఉంటుంది కానీ తర్వాత వెన్నంటే  వచ్చే జలుబును భరించడం కష్టం.ఒకరికి వచ్చిపోదు కదా!తగిన జాగ్రత్త తీసుకోకుంటే ఇంటిల్లిపాదీ చుట్టబెడుతుంది.అందుకే చిన్న గొడుగు వెంట తీసుకెళ్ళడం శ్రేయస్కరం.పొరపాటున వర్షంలో తడిస్తే ఇంటికి రాగానే జుట్టు ఆరబెట్టుకున్నాం కదా!అనుకోకుండా తల స్నానం చేస్తే జుట్టు ఆరోగ్యంగా ఉంటుంది.ఇకపోతే వర్షాకాలంలో వేడివేడిగా మిరియాలపొడి వేసిన సూపులు,వేడిగా ఉన్నప్పుడే ఆహరం తీసుకోవాలి.సాద్యమైనంత వరకు బయట చిరుతిళ్ళు తినకపోవడమే మంచిది.ఎందుకంటే ఉల్లి.కీరా,కారట్,కాబేజీ వంటి పచ్చి కూరగాయ ముక్కలు,తురిమి నిల్వ ఉంచితే బాక్టీరియా చేరి త్వరగా డయేరియా వంటి వ్యాధుల బారిన పడే ప్రమాదముంది.జర భద్రంగా ఉంటే ఖాళీ సమయంలో వేడివేడి మొక్కజొన్నపొత్తులు,మిరపకాయ బజ్జీలు,ఈ సమయంలో దొరికే నేరేడు,సీమ రేగు పండ్లు తింటూ,బత్తాయి రసం తాగుతూ,మరీ ముఖ్యంగా సహజంగా దొరికే పుట్టగొడుగులతో రకరకాల వంటలు తింటూ వర్షా కాలాన్ని చక్కగా సంతోషంగా ఆస్వాదించవచ్చు.   

నవనవలాడే మునగాకు

                                                           కుసుమ ఇంటి పెరట్లో పనిమనిషి ఎక్కడినుండో తెచ్చి ఒక మునగ మొక్క పెట్టింది.అది వర్షాలు పడేసరికి నవనవలాడుతూ రెండు అడుగుల ఎత్తు పెరిగింది.లేతగా పచ్చిఆకు చూడటానికి ఎంతో బాగుండేసరికి కుసుమ భర్త నాలుగు రెమ్మలు తెచ్చి పప్పులో వేయమనేసరికి అది ఎలా చేయాలో తెలియక బిత్తరపోయింది.తర్వాత తేరుకుని పక్కింట్లో ఉన్నఆడపడుచును పిలిచి మీ ఆన్నయ్య మునగాకు తెచ్చి పప్పులో వెయ్యమన్నారు.నాకేమో ఎలా చెయ్యాలో తెలియదు.నీకు ఏమైనా తెలుసా?అని అడిగింది.నాకూ తెలియదు కానీ మా పిన్ని కూతురు రకరకాల వంటలు చేస్తుంది.ఆమెను అడగమని ఒక నంబరు ఇచ్చింది.ఆమెను అడగగానే చేసే విధానం చెప్పింది.చెప్పడమే కాక మునగాకుతో ఎన్ని రకాలు చేయవచ్చో అన్నీ పేపరు మీద రాసి ఒకతనికి ఇచ్చి పంపింది.ఆమె అలా అడగగానే బాధ్యతగా పంపినందుకు కుసుమకు చాలా సంతోషంగా అనిపించి తర్వాత రోజు ఫోనుచేసి మరీ కృతజ్ఞతలు తెలిపి పప్పు చాలా బాగుంది.పప్పు తినని మా అబ్బాయి కూడా ఇష్టంగా తిన్నాడు అని చెప్పింది.ఆషాడం వచ్చిందంటే నవనవలాడుతూ లేత మునగాకు నోరూరిస్తూ ఉంటుంది.ఎప్పుడూ తినని వాళ్ళకు కూడా తినాలనిపించేలా చేసింది.  

తొట్టి పిల్లలు

                                                                  సింధూర చెల్లెలు సింధుజ తన స్వంత ఇంటిలో మొదటి అంతస్తులో ఉంటుంది.ఒకరోజు సింధూర చెల్లెలు ఇంటికి వెళ్ళింది.ఎండలకు తట్టుకోలేక వేసవి కాలం వచ్చే లోపు రెండో అంతస్తు వేద్దామని హడావిడిగా మొదలు పెట్టామని సింధూరకు చెప్పింది.మీరు పైఅంతస్తులోకి మారతారా?అంటే అదేమీ లేదు అక్కా!అంది.ఎండలకు తట్టుకోలేకపోతే చల్లగా ఉండటానికి హాల్లో కూడా ఏ.సి పెట్టుకోకపోయారా?అంది సింధూర.హాలు పెద్దది కనుక చల్లగా ఉండాలంటే మధ్యలో అద్దాలు పెట్టాలని మేస్త్రి చెప్పాడు.మా పిల్లల సంగతి నీకు తెలియనిదేముంది.అసలే తొట్టి పిల్లలు(కొంటె పిల్లలు కాబోలు) అద్దాలు రెండో రోజుకే పగలగొట్టేస్తారు.అందుకే చల్లగా ఉండటానికి ఇంకో అంతస్తు వెయ్యాల్సి వస్తుంది అని అక్కకు చెప్పింది.   

ఇల్లు గుల్ల

                                                    సావిత్రికి బంగారు నగలంటే తగని మోజు.తన దగ్గర ఉన్న డబ్బు అవసరానికి అడిగారు కదా అని అన్నకు,అక్కకు ఇస్తే డబ్బు తిరిగి ఇవ్వకుండా చెల్లితో మాట్లాడటం మానేశారు.డబ్బు ఇచ్చి ఎదురు పగ ఎందుకులే అని ఎప్పటికప్పుడు ఉన్న డబ్బుతో బంగారం కొనుక్కోవడం మొదలుపెట్టింది.ఆడపిల్లలకు కూడా తలా 100 కాసులు పెట్టింది.తను కూడా ఒక 100 కాసులు పెట్టి రకరకాలుగా నగలు చేయించుకుంది.పిల్లలు విదేశాలలో ఉంటారు కనుక అమ్మ దగ్గరకు వచ్చినప్పుడు అమ్మ నగలు పెట్టుకుంటారు.చిన్నఅమ్మాయి మరిది పెళ్ళికి వచ్చి అమ్మ నగలు లాకరు నుండి తెచ్చిఅమ్మాకూతుళ్ళు పెట్టుకున్నాక ఇంట్లో పెట్టేసి లాకరులో పెట్టకుండా ఊరు వెళ్లారు.చిన్న అమ్మాయిని విమానం ఎక్కించి అటునుండిఅటు భార్యాభర్తలు యాత్రలకు వెళ్ళి 10 రోజులకు ఇంటికి వచ్చేటప్పటికి ఇల్లు గుల్లయింది.సావిత్రి 100 కాసుల నగలు దొంగలు మూట కట్టుకుని ఎవరికీ అనుమానం రాకుండా తలుపులు దగ్గరకు వేసి వెళ్ళి పోయారు.స్నేహితులు పరామర్శించటానికి వెళ్తే సావిత్రి లబోదిబో అంటూ పైసాపైసా కూడబెట్టి తినోతినకో బంగారం అమర్చుకుందామని నగలు చేయించుకుని దొంగల పాలు చేసినట్లయిందని భోరున ఏడుస్తుంటే చూడటానికి,వినటానికి కూడా చాలా భాధ అనిపించింది.

పూలరంగడు

                                                                          ఆర్యేష్ వయసుకు చిన్నవాడైనా పాతకాలంలో పూలరంగడిలా వేషధారణ,ముఖంలో హావభావాలు పలికిస్తూ అచ్చు అలాగే తయారవుతాడు.ఎత్తుకు ఎత్తు,లావుకు లావు తెల్లటి బట్టలతో చేతికి బంగారు కడియం,మెడలో పులిగోరుతో ఉరితాడు లాంటి బంగారపు గొలుసు చొక్కా పైకి వేలాడేలా వేసుకుని,చేతి వేళ్ళకు మందంగా రంగురంగుల రాళ్ళతో ఉంగరాలు ధరించి,కళ్ళకు నల్లద్దాల కళ్ళజోడు ధరించి,కాళ్ళకు తెల్లటి చెప్పులు వేసుకుని చదువుకోరా!బాబూ అంటే కళాశాలకు ఒకరోజు వెళ్ళి ఒకరోజు వెళ్ళక కనిపించిన అమ్మాయినల్లా మేక కళ్ళేసుకుని నోరు తెరుచుకుని చూస్తుంటే ప్రతి ఆడపిల్ల తిట్టడమే.పూర్వం పనీపాట లేక ఈ విధంగా ముస్తాబు చేసుకుని రోడ్లపై తిరిగే వాళ్ళను పూలరంగడిలా తయారయ్యాడు అనేవాళ్ళు.ఆర్యేష్ చూడటానికి అచ్చు పాతకాలం నాటి పూలరంగడిని తలపిస్తాడు.

ఎండుటాకు మాదిరిగా.....

                                                      ప్రేమ లత ఉదయాన్నే తలుపు తెరవగానే వరండాలో ఒక మూలగా గుప్పెడు ఎండు వేపాకులు పక్కింటిలో నుండి గాలికి ఎగిరి వచ్చిచేరాయి.విసుగ్గా మొహం పెట్టి వాటిని చేత్తో తీసి చెత్త డబ్బాలో వేద్దామని పట్టుకుంది.ఇంతలో చేతిలో ఎండుటాకు  కదిలినట్లుగా అనిపించింది.ఉదయాన్నే ఏదో ధ్యాసలో ఉండి అలా అనిపించిందేమోలే అనుకుని చెత్తలో వేసింది.మళ్ళీ ఆకుల మధ్య కదలిక కనిపించేసరికి ఏంటా?అని చూచేసరికి అచ్చు ఎండుటాకు మాదిరిగానే అదే రంగులో ఉన్న కొంచెం రెక్క తెగిన సీతాకోక చిలుక నిదానంగా ఇవతలకు వస్తుంది.అయ్యో!పాపం సీతాకోక చిలుక ఎండుటాకుల్లో అదే రంగులో కలిసిపోవటం వల్ల చూడలేదనుకొని దాన్ని చెత్త డబ్బాలో నుండి తీసి బయటకు తీయగానే నిదానంగా ఎగిరి వెళ్ళిపోయింది.హమ్మయ్య!పొద్దున్నే ఒక ప్రాణిని కాపాడగలిగానని ప్రేమ లత సంతోషపడింది.

అరమీటరే ఎక్కువ

                                                                  మధుమతి,సావిత్రి పక్కపక్క ఇళ్ళల్లో ఉండేవారు.సావిత్రి పెద్ద ఎచ్చులకోరు.ప్రతి దాంట్లో మీ అందరి కన్నా నేనే గొప్పఅని స్వంత డబ్బాకొట్టుకునేది.ఆఖరుకు తను వేసుకునే జాకెట్టు కూడా మీ అందరి వాటి కన్నాగొప్పదనేది.మీ అందరికీ ముప్పాతిక మీటరు పడితే నాకు అర మీటరే ఎక్కువ అని చెప్పేది.అది ఎలాగంటే అర మీటరు జాకెట్టు ముక్క తెచ్చుకుని గట్టిగా బిగదీసి వేసుకున్నట్లుగా తనే స్వయంగా కుట్టుకునేది.సావిత్రి కుటుంబం మొత్తం అనుకోకుండా స్వంత ఊరు వెళ్ళిపోయారు.ఒక పది సంవత్సరాల తర్వాత సావిత్రి మధుమతి ఇంటికి వచ్చింది.అప్పుడు మధుమతి కూతురు చిన్నది.ఆంటీ గుర్తున్నారా?అని అడిగితే ఎందుకు గుర్తుండరు?టైట్ జాకెట్ల ఆంటీ కదా!లొడలోడా మాట్లాడేవాళ్ళు ఎదుటివాళ్ళను కూరలో కరివేపాకు లాగా ఏరి పారేసేది అనేసింది,ఆ మాటలకు మదిమతి ముఖం.వెలా తెలా పోయింది.సావిత్రి ముఖం తెల్లగా పాలిపోయింది.

అసంకల్పిత చర్య

                                                       సోమేష్ నిద్రపోయేటప్పుడు లేపితే ఒక పట్టాన లేవడు.ఒకవేళ లేచినా కూడా ఏదైనా ముఖ్యమైన పని చెప్పినా ఆ విషయం నిద్ర లేచిన తర్వాత గుర్తు ఉండదు.నువ్వు నాకెప్పుడు చెప్పావు?అంటాడు.సోమేష్ నిద్రపోయే గదిలో ఏదైనా పని ఉండి ఎవరైనా లైటు వేస్తే మాత్రం గభాల్న లేచి మొహంచిట్లించుకుని నిండా ముఖం మీదకు కూడా దుప్పటి ముసుగు వేసుకుని నిద్రపోతాడు.అప్పుడు కుడా అతను తనకు తెలిసి చేసిన పని కాదు.అసంకల్పిత చర్య అన్నమాట.అన్న మాటేమిటి?ఉన్నమాటే.

రావమ్మా మహాలక్ష్మి

                                                లక్ష్మిదేవి అలంకార ప్రియురాలు.వరలక్ష్మీ వ్రతం రోజు ఇంటిని మామిడితోరణాలతో, రకరకాల రంగుల పువ్వులతో,పూదండలతో ఎంత అందంగా అలంకరిస్తే అంత శుభం జరుగుతుందని నమ్మకం. ప్రత్యేకించి చామంతి పువ్వులతో అమ్మవారికి పూజ చేయడం ఆచారం.ఐదు రకాల పువ్వులు,ఐదురకాల పండ్లు ఐదు రకాల పిండి వంటలు తప్పనిసరి.ఆపై ఎన్ని రకాలైనా పెట్టుకోవచ్చు.వాయనానికి తొమ్మిది పోగుల తోరము,తొమ్మిది పూర్ణాలు తప్పనిసరి.నిష్కల్మషంగా,నిర్మలమైన మనస్సుతో మా ఇంటికి రావమ్మా మహాలక్ష్మీ అంటూ మనస్పూర్తిగా ఆహ్వానించి లక్ష్మిదేవిని పూజిస్తే అంతా శుభమే.మహాలక్ష్మి కోరిన కోర్కెలు తీర్చే కల్పవల్లి.స్త్రీలు సౌభాగ్యంగా ఉండాలని,తన కుటుంబం ఆయురారోగ్యాలతో,అష్టైశ్వర్యాలతో తులతూగాలని భక్తి శ్రద్ధలతో వరలక్ష్మీ వ్రతాన్ని ఆచరిస్తారు.ఈ వ్రతంలో లక్ష్మీపార్వతుల సమన్వయం కనిపిస్తుంది.స్త్రీలు ఒకరికొకరు సఖ్యతతో ఎలా ఉండాలో తెలియచెప్పే వ్రతం.తోటి వారంటే గౌరవం,ప్రేమ ఉండి అందరితో సత్సంబంధాలు కలిగి సంతోషంగా ఉండేవారి దగ్గర, డబ్బును గౌరవించి,పూజించి,విలువ తెలిసిన వాళ్లదగ్గర మాత్రమే లక్ష్మీదేవి కలకాలం నిలుస్తుంది.డబ్బంటే నిర్లక్ష్యం అసలు ఉండకూడదు.అందరి దగ్గర లక్ష్మీదేవి కలకాలం ఉండాలని,అమ్మ అనుగ్రహం అందరికీ లభించాలని ప్రార్ధిద్దాము.

ఎప్పుడంటే అప్పుడు.......

                                                            ఖాళీ సమయంలో కారట్ తురిమి గాలి చొరబడని డబ్బాలో పెట్టి ఫ్రిజ్ లో పెట్టుకుంటే ఒక వారం రోజులు తాజాగా ఉంటుంది.ఒక్కొక్కటి తురుముకోవలసిన అవసరం లేకుండా ఎప్పుడు కావాలంటే అప్పుడు వాడుకోవచ్చు.వేపుళ్ళలో వేసినప్పుడు కారట్ వేగీ వేగకుండా తీసేయాలి.దేనిలో వేసినా బాగుంటుంది.దీనికి తోడు పచ్చి బఠాణీ,ఉల్లి కాడలు ఫ్రిజ్ లో అట్టిపెట్టుకుంటే పిల్లలకు రకరకాల వంటలు అప్పటికప్పుడు చేసిపెట్టవచ్చు.రంగు రంగులతో ఉంటే పిల్లలకు చూడటానికి కంటికి ఇంపుగా ఉండటమేకాక అన్నీ వెయ్యటంవల్ల నోటికి రుచిగా ఉండి తినటానికి ఇష్టపడతారు.పెద్దవాళ్ళు కూడా అన్ని రకాల కూరగాయలు తినడం  ఎంతో మంచిది.