నూతన అంగ్ల సంవత్సర శుభాకాంక్షలు

                                                      నా బ్లాగ్ వీక్షకులకు,తోటిబ్లాగర్లకు,మిత్రులకు,శ్రేయోభిలాషులకు

నూతన ఆంగ్ల సంవత్సర శుభాకాంక్షలు.2018 వ సంవత్సరంలో అందరూ ఆనందంగా సంపూర్ణ ఆయురారోగ్యాలతో,అష్టైశ్వర్యాలతో తులతూగాలని మనస్పూర్తిగా కోరుకుంటూ మరోసారి అందరికీ నూతన సంవత్సర శుభాకాంక్షలు తెలియచేస్తున్నాను.

 

క్షణం తీరిక దమ్మిడీ ఆదాయం

                                                                        క్షణం తీరిక లేదు దమ్మిడీ ఆదాయం లేదు అనే సామెతను గుర్తు చేసుకోవడానికి అన్నట్లు త్రిపుర ఒక్క క్షణం కూడా ఖాళీగా లేకుండా ఎదో ఒక పని చేస్తూనే ఉండేది.అమ్మా త్రిపురా!ఇక్కడ వరకు వచ్చిన తర్వాత నువ్వు గుర్తొచ్చి చూచి పోదామని వచ్చాము అంటూ బంధువులు ఒక కుటుంబం తర్వాత ఇంకొక కుటుంబం ఉదయం నుండి రాత్రి వరకు వస్తూనే ఉంటే వారికి వండి వార్చి పెట్టడమే సరిపోయేది.వయసులో ఉన్నప్పుడు సరదాగా బొంగరంలా తిరుగుతూ హడావిడిగా పనులు చేస్తూ,పనివాళ్ళతో చేయిస్తూ సంతోషంగానే ఉండేది.వయసు పెరుగుతున్న కొద్దీ విసుగ్గా గానుగెద్దు జీవితంలా అనిపించడం మొదలు పెట్టింది.అనిపించగానే త్రిపుర వెనక్కు తిరిగి చూస్తే ఏముంది?ఖర్చు,చాకిరీ తప్ప క్షణం తీరిక దమ్మిడీ ఆదాయం లేని జీవితం వెక్కిరిస్తున్నట్లు తోచింది.తిని వెళ్ళిన వాళ్ళే గుర్తు లేనట్లు నటిస్తుంటే తనంటే ప్రేమతో కాదు స్వార్ధంతో ఇంటికి వచ్చేవారని తెలుసుకునేసరికి సగం జీవితం కరిగిపోయింది.వాళ్ళు ఏ ఉద్దేశ్యంతో వచ్చినా ఇంటికి వచ్చిన అతిధులకు మర్యాదగా భోజనం పెట్టడం మన సంప్రదాయం,సంస్కారం కనుక త్రిపురకు ఇంటి ఇల్లాలిగా తన ధర్మాన్ని సక్రమంగా నెరవేర్చానన్న సంతృప్తి మిగిలింది. 

రోజుకొకసారి.....

                                               చలికాలంలో ఎంత జాగ్రత్తగా ఉన్నా చర్మం నునుపుదనం కోల్పోయి పొడిబారుతూ ఉంటుంది.ఈ విధంగా చర్మం పొడిబారకుండా ఉండాలంటే ముందు జాగ్రత్తగా చలి బాగా పెరగక ముందే ఒక గిన్నెలో ఒక అర కప్పు లేత కలబంద గుజ్జు,ఒక కప్పు నీళ్ళు,ఒక చెంచా కొబ్బరి నూనె లేదా ఆలివ్ నూనె బాగా కలిపి ఒక సీసాలో పోసి పెట్టుకోవాలి.దీన్నికొంచెం చేతిలో వేసుకుని రోజుకొకసారి ముఖానికి,మెడకు చేతులకు,పాదాలకు పలుచగా రాసుకుని ఒక పది ని.ల తర్వాత రుద్ది కడగాలి.రోజుకొకసారి ఇలా చేయడం వలన చర్మం గరుకుగా లేకుండా నునుపుగా తయారవుతుంది.

తప్పొప్పులు ఎంచక

                                                        మనకు ఎక్కువ ఆశ్చర్యం,సంతోషము అనిపించినప్పుడు ఎంతో ఉత్సాహంగా ఉంటుంది.ఇలా ఏకకాలంలో సంభ్రమాశ్చర్యం కలిగించే సంఘటనలు రోజూ ఎక్కువగా  ఎదురు కాకపోవచ్చు.అందుకే నిత్య జీవితంలో ఎదురయ్యే ప్రతి సంఘటనలోను తప్పొప్పులు ఎంచక ఏ చిన్న సంతోషకరమైన విషయాన్నైనా చిన్న పిల్లల్లా ఆనందించినప్పుడే ఆరోగ్యంగా ఉంటారని నిపుణులు,పెద్దల సూచన.ప్రకృతి సౌందర్యాన్ని, నచ్చిన స్నేహితులనో,బంధువులనో అకస్మాత్తుగా చూచినప్పుడు మనసుకి ఎంతో ఆనందం కలుగుతుంది.ప్రతి ఒక్కరు ఎన్ని పనులున్నా వీలుకల్పించుకుని సాధ్యమైనంతవరకు అప్పుడప్పుడు కుటుంబంతో కలిసి ప్రకృతి సౌందర్యాన్ని ఆస్వాదిస్తూ,తరచు ఆప్తులను కలిసి మాట్లాడుకుంటూ ఉంటే  మనసుకు హాయిగా ఉండి ఉత్సాహంగా పనిచేసుకుంటూ ఆరోగ్యంగా ఉండొచ్చు.

చలికాలంలో చర్మం

                                                   చలి మొదలవగానే చాలామందికి చర్మం పొడిబారి పోతుంటుంది.చలికాలంలో కూడా చర్మం మృదువుగా ఉండాలంటే రోజుకి మూడు లీటర్ల నీళ్ళు తప్పనిసరిగా తాగాలి.ఏడెనిమిది గంటలు నిద్ర తప్పనిసరి.స్నానానికి పది ని.లు ముందు కొబ్బరి నూనెతో మర్దన చేసి గోరు వెచ్చటి నీటిలో ఒక చెక్క నిమ్మరసం పిండి ఆ నీటితో  స్నానం చేస్తే తాజాగా బాగుంటుంది.రోజూ యోగా లేదా తేలికపాటి వ్యాయామం చేయాలి.ఈ కాలంలో సహజంగా వచ్చే ఒళ్ళు నొప్పుల సమస్య బాధించదు.ధ్యానం చేసుకుంటే మనసు ప్రశాంతంగా ఉంటుంది.వారానికి రెండు సార్లు ఒక స్పూను తాజా పెరుగు,తేనె,బాదంపొడి లేదా శనగపిండి కలిపి ముఖానికి,కాళ్ళకు,చేతులకు రాసుకుని 15 ని.ల తర్వాత కడిగేయాలి.సమయం ఉంటే కనీసం వారానికి ఒకసారైనా శరీరం మొత్తానికి ఈ మిశ్రమం రాసుకుని స్నానం చేస్తే చర్మం  మృదువుగా మెరుస్తూ ఉంటుంది.రాత్రి పడుకునే ముందు మాయిశ్చరైజర్ రాసుకోవాలి.రోజూ రాత్రి నిద్రపోయే ముందు పెదవులకు బాదం నూనె రాసుకుంటే పొడిబారకుండా మృదువుగా ఉంటాయి.ఇవన్నీ పాటిస్తూ ఈ కాలంలో దొరికే అన్నిరకాల పండ్లు,కూరగాయలు తాజాగా తీసుకుంటుంటే చలికాలంలో చర్మం పొడిబారే సమస్యను అధిగమించవచ్చు.

బొమ్మలాట

                                                                      ఒకప్పుడు పెళ్ళంటే నూరేళ్ళ పంట.ఇప్పుడు కొంత మందికి పెళ్ళంటే బొమ్మలాట అనడానికి ఇదొక ఉదాహరణ.బొమ్మలపెళ్ళి అనుకోవడానికి ఏమైనా చిన్న పిల్లలకి చేశారా?అంటే అదీ లేదు.ఇద్దరికీ పాతిక సంవత్సరాలు దాటి రెండు మూడేళ్ళు.ఇద్దరూ సాంకేతిక రంగంలో పట్టభద్రులు.నగరంలో ఉంటూ ఉద్యోగాలు చేస్తున్నారు.ఇద్దరి తల్లిదండ్రులు ఆకాశం అంత పందిరి,భూదేవి అంత అరుగు వేసి అన్నట్లు  ఒకరికొకరు పోటాపోటీగా డబ్బు ఖర్చుపెట్టి ఘనంగాపెళ్ళి చేశారు.పెళ్ళయిన మూడోరోజే అమ్మాయి,అబ్బాయి మేము ఇద్దరమూ విడిపోతామని ఖరాఖండీగా చెప్పేశారు.పెళ్ళంటే బొమ్మలాట అనుకుంటున్నారా?కారణం ఏమిటి?అంటే కారణం వాళ్ళకే తెలియదు.కలిసి బ్రతకలేము అంతే.మరో మాటకు ఆస్కారము లేదు.పెళ్ళి కుదిరి మూడు నెలలు అయింది.ఇన్నాళ్ళు బాగానే ఉన్నారు కదా?అంటే దానికి సమాధానం లేదు.వీళ్ళ పరిస్థితి ఇలా ఉంటే ఇంకో జంటకు పెళ్ళయి పదేళ్ళయింది.ఇద్దరు బిడ్డలకు తల్లిదండ్రులు.ఇద్దరికీ పిల్లలు కావాలి.కానీ వాళ్ళు కలిసి బ్రతలేమని తేలికగా తేల్చి చెప్పేశారు.వీళ్ళు బిడ్డల మానసిక పరిస్థితి,తల్లిదండ్రుల పరిస్థితి  ఆలోచించటం లేదు.వాళ్ళు తల్లిదండ్రుల గురించి పట్టించుకోవటం లేదు.విడిపోవడం కూడా బొమ్మలాటలో బొమ్మల పెళ్ళి చేసినంత తేలిగ్గా అయిపోయింది. 

దీపావళి శుభాకాంక్షలు

ఇంటింట ప్రతి ఇంట ఘనంగా,ఆనందంగా దీపావళి జరుపుకోవాలని కోరుకుంటూ అందరికీ హృదయ పూర్వక దీపావళి శుభాకాంక్షలు.