నందనవనం

                                                              మనిషి మెదడు పూలతోట వంటిది. మంచి ఆలోచనలతో అందమైన పూలతోటగా మార్చుకుంటామో, చెడు ఆలోచనలతో బీడుగా మార్చుకుంటామో మన నిర్ణయంపై ఆధారపడి ఉంటుంది.కలుపు మొక్కలు, తెగులు వఛ్చిన మొక్కలు, ఆకులు ఎప్పటికప్పుడు తీసేసి జాగ్రత్తగా తోటను కాపాడుకుంటే అందమైన పూతోటగా మారిపోతుంది. అదే విధంగా ఈర్ష్య,అసూయా, ద్వేషాలు అనే చెడు లక్షణాలను మన మెదడు నుండి తీసేస్తే జీవితం నందనవనంగా మారిపోతుంది.అంతా మన చేతులలోనే ఉంది.మంచి ఏదో, చెడు ఏదో తెలుసుకుని సరైన నిర్ణయాలు తీసుకుని మంచిదారిలో నడుస్తూ పదిమందికి చేతనైన సహాయం చేస్తూ జీవితాన్ని నందనవనంగా మార్చుకుంటారు అని ఆశిస్తూ అందరికీ నమఃసుమాంజలి .

మంచివాడు - ముంచేవాడు

                                                       మంచివాడు నిజం చెప్పినా, మంచి విషయాలు చెప్పినా ఎవరు నమ్మరు. ముంచేవాడు అబద్దాలు చెప్పినా, ఎదుటివారు నష్టపోవాలని తియ్యటి మాటలు చెప్పి మోసం చెయ్యాలనుకున్నా వాడినే గుడ్డిగా నమ్ముతారు.అందుకే ముంచేవాడు ఎప్పుడూ మందిలో ఉంటాడు. మంచివాడు ఒంటరిగా ఉంటాడు.నిజం నిలకడ మీద తెలుస్తుంది కనుక ఎప్పటికైనా మంచివాడి మంచితనమే ముంచేవాడి మోసం పైన గెలుస్తుంది.ముంచేవాడి బడాయిమాటలు విని మోసపోకుండా కాస్త లోకాజ్ఞానంతో ముందే జాగ్రత్త పడటం ఉతత్తమం.

విజేత - పరాజిత

                                                             ఏ పని మొదలుపెట్టినా కష్టాలు, నష్టాలు, బాధలు,అడ్డంకులు,తిరస్కరణలు, వైఫల్యాలు, అవమానాలు ఇలా ఎన్ని ఇబ్బందులు ఎదురైనా వెనుకడుగు వేయకుండా ధైర్యంగా లక్ష్యాన్ని  చేరుకునేవరకు పట్టుదలగా శ్రమించి విజయం సాధించేవారే విజేతలు .ఈ క్లిష్ట ప్రయాణంలో ఏమాత్రం అలసత్వంతో విశ్రమించినా, ఏమరపాటుతో ఉన్నా, ఇబ్బందులను సాకులుగా చూపుతూ ఆగిపోయినా పరాజితులుగా మిగిలిపోతారు.కనుక మొదలుపెట్టేటప్పుడే అన్నీ అలోచించి ఆచితూచి ధైర్యంగా ముందడుగు వేసి మధ్యలో ఆగిపోకుండా ముందుకు సాగిపోతూ లక్ష్యాన్ని చేరుకొని విజేతలుగా మారాలి. 

తమాషాకి కూడా ఎగతాళి చేయకండి

                                                       కొంతమంది సరదాగానో, తమాషాగానో మాట్లాడుతున్నామని అనుకుని ఎదుటివారిని వారి రూపాన్ని బట్టి మారుపేర్లతో పిలుస్తూ ఎగతాళి చేస్తూ ఉంటారు.మనం మాట్లాడే మాట చిన్నదే అనుకుంటాము. కానీ వాళ్ళ మనసుకు ఎంత బలంగా తగులుతుందో ఆ బాధ అనుభవించేవాళ్లకు మాత్రమే తెలుస్తుంది.ఒక దెబ్బ కొట్టినా రెండు రోజులకు పోతుంది. కానీ మనసుకు బాధ కలిగే విధంగా ఒక మాట అంటే వారి ఆత్మాభిమానాన్ని దెబ్బతీస్తుంది.కొంతమంది తేలిగ్గా తీసుకుంటారు కానీ కొంతమంది ప్రాణం పోతున్నట్లు విలవిలలా డిపోతుంటారు.బయటకు చెప్పుకోలేక వాళ్ళల్లో వాళ్ళే కుమిలిపోతూ మానసిక క్షోభకు గురై ఆత్మహత్యా ప్రయత్నాలు చేస్తూ ఉంటారు.కళాశాలల్లో, పాఠశాలల్లో, ఇరుగుపొరుగు వారిని కూడా కొంతమంది సంస్కారం లేక ఇటువంటి పిచ్చి పనులు చేస్తుంటారు.దయచేసి ఎవరైనా సరే తోటివారిని తమాషాకి కూడా ఎగతాళి చేయకండి.

విజయానికి దారి

                                                          జీవితంలో మనకు ఎదురైన ప్రతి సవాలు మన శక్తిని, నమ్మకాన్ని పరీక్షస్తుంది.ధైర్యంగా నిలబడితే అదే మన విజయానికి దారిగా మారుతుంది. ప్రతి కష్టం ఒక పాఠం నేర్పుతుంది. అదే  విజయానికి అర్హతను ఇచ్చి అందలం ఎక్కిస్తుంది.

చిన్నదే మహా అద్భుతం

                                                                    చిన్న విత్తనం నుండి పుట్టిన మొక్క మహావృక్షముగా పెరిగినట్లు, చిన్న జలపాతం మహానదిగా మారినట్లు,చిన్న చిరుజల్లు కుంభవృష్టిగా మారినట్లు, మనం వేసే చిన్ని మొదటి అడుగే మనకు అద్భుతమైన విజయాలను తెస్తుంది.ప్రపంచంలో అన్నీ చిన్నగానే ప్రారంభమై తర్వాతే అద్భుతాలుగా రూపు దిద్దుకుంటాయి.ఒకేసారి భారీగా మొదలుపెట్టి సక్రమంగా నిర్వహించలేక చతికిలపడే బదులు మనకు తగినంతలో చిన్నగా మొదలుపెట్టి దానిని అభివృద్ధిలోకి తేవడానికి తగినంత కృషి చేసి విజయం సాధించగలిగితే వచ్ఛే అనందం అంతాయింతా కాదు .చిన్నదే మహా అద్భుతం.కొండంత తృప్తి.

నిజమైన అదృష్టం

                                                  అదృష్టం అంటే ఆస్తులు, అంతస్థులు కలిగి ఉండటం కాదు. ప్రతిరోజు మనల్ని అర్థం చేసుకుని,గుర్తుపెట్టుకుని ప్రేమగా పలకరించే మంచి మనసున్న మనుషులు మనవాళ్ళుగా ఉండటమే మన నిజమైన అదృష్టం.

అమ్మకానికి దొరకనివి

                                                     మనము అంగడికి వెళ్ళి డబ్బు పెట్టి కొనుక్కుందామని అనుకున్నా అమ్మకానికి దొరకనివి చాలా ఉన్నాయి. వాటిలో మచ్చుకి రెండు తెలియచేస్తున్నాను.అవి ఆనందము, నమ్మకము. ఆనందము మనుషులతో పంచుకోవాలి.మన వాళ్ళతో పంచుకున్నప్పుడే రెట్టింపు ఆనందము పొందగలుగుతాము.నమ్మకము మనస్సులో పెంచుకోవాలి.నమ్మకము కోల్పోతే మన విలువ అయినా, ఎదుటివారి విలువ అయినా కోల్పోవలసి వస్తుంది.

మహానటులు

                                                                   మహానటులు ఎక్కడో ఉండరు. మనమధ్యనే బంధువుల రూపంలో, స్నేహితుల రూపంలో తిరుగుతూ ఉంటారు.మన ముందు ఒక మాట. మన వెనుక ఒక మాట. ఇటువంటి మహానటులతో ఎన్నో ఇబ్బందులు ఎదుర్కోవాల్సి వస్తుంది.ఎవరు ఎటువంటివాళ్ళో తెలుసుకుని వాళ్ళతో ఎంతవరకు ఉండాలో,వాళ్ళను ఎంతవరకు ఉంచాలో అంతవరకే ఉంచాలి.కనుక వీరితో తస్మాత్ జాగ్రత్త.

డబ్బుతో కొనలేనివి

                                                       మనలో చాలామంది జీవితము అంటే డబ్బు ఒక్కటే ముఖ్యం అని డబ్బు ఒక్కదానికే ప్రాధాన్యత ఇస్తూ మిగతా వాటిని లెక్కచేయకుండా డబ్బు ముందు అన్నీ బలాదూరు అన్నట్లు ప్రవర్తిస్తూ ఉంటారు.డబ్బుతో ఏదైనా కొనగలము, చేయగలము, దేన్నైనా సాధించగలము అని అనుకుంటారు. కానీ అన్నింటి కన్నా విలువైన కాలము, సంతోషము,నిజమైన స్నేహితులు, కలలు, నమ్మకం, ప్రేమ, ఆప్యాయతలు, ఆరోగ్యం ...... మొదలైనవి డబ్బుతో కొనలేనటువంటివి.కొనుక్కుందామని అనుకున్నా ప్రపంచములో ఎక్కడా దొరకనటువంటివి చాలా ఉన్నాయి.కనుక డబ్బు వెనుకే ఉరుకులు పరుగులు తీస్తూ చిన్నచిన్న సంతోషాలను కోల్పోకూడదు. ఎల్లప్పుడూ పరుగులు తీయకుండా అప్పుడప్పుడూ విరామం తీసుకుంటూ ఆ విరామంలో కుటుంబంతో సంతోషంగా గడుపుతూ ఉండాలి. పిల్లలకు కూడా చిన్నప్పటి నుండే ప్రకృతిని ప్రేమిచడం, ప్రకృతి వనరులను వృధా చేయకుండా ఎలా ఉపయోగించుకోవాలో,ఆపదలో అవసరమైన వారికి సాయం చేయడం,పెద్దలను గౌరవించడం వంటివి తెలియచెప్పాలి.పుస్తకపఠనము అలవాటు చేస్తూ పుస్తకజ్ఞానంతోపాటు లోకాజ్ఞానాన్ని కూడా కలుగచేయాలి.డబ్బుంది కదా అని బయట చిరుతిండి అలవాటు చేయకుండా ఆరోగ్యకరమైన ఆహారపుఅలవాట్లు చేస్తుంటే శారీరకంగా, మానసికంగా ఆరోగ్యంగా ఉంటారు.పిల్లలు చిన్నప్పటినుండి ఎవరి పనులు వాళ్ళు చేసుకునేలా ప్రోత్సహించాలి.పిల్లలను సంస్కారవంతులుగా తీర్చిదిద్దడం పెద్దల బాధ్యత. సంస్కారం కూడా డబ్బుతో కొనలేనిది.

అంతా మన మంచికే

                                                           మన పనులను భక్తితో భగవంతుడ్ని, సద్గురువుని స్మరిస్తూ చేయడం వలన  మనకు దైవానుగ్రహము, సద్గురుబలం తోడుగా ఉంటుంది.దేని గురించి అయినా ఎక్కువగా ఆలోచించి దిగులు పడటం మంచిది కాదు. మనము అనుకున్నవన్నీ జరగాలనే నియమం ఏమీ లేదు.కానీ దైవసంకల్పంతో మనకు జరిగేవన్నీ మన మంచికే జరుగుతాయాని అర్థం చేసుకోవాలి.మంచి అయినా, చెడు అయినా అన్నింటిని సానుకూల దృక్పధంతో చూడగలిగినప్పుడే అంతా మన మంచికే అనే భావంతో ముందడుగు వేసి విజయాన్ని  సాధించగలుగుతాము. 

బంగారు బాట

                                                   జీవితం అంటే అందరికీ వడ్డించిన విస్తరి కాదు.ప్రతి ఒక్కరికి చిన్నదో పెద్దదో ఏదో ఒక బాధ ఉంటూనే ఉంటుంది.ఆలా అని పదే పదే ఒకే విషయం గురించి ఆలోచిస్తూ దాన్నే తలచుకుని బాధపడుతూ అక్కడే ఆగిపోకూడదు. సాధ్యమైనంతవరకు గతాన్ని మరిచిపోయి వర్తమానంలో జీవిస్తూ భవిష్యత్తు గురించి ఆలోచించాలి.అంతే తప్ప గడిచిపోయిన గతాన్ని పట్టుకుని వేళ్ళాడుతూ వర్తమానాన్ని ప్రశాంతత లేకుండా చేసుకుని భవిష్యత్తు గురించి ఆలోచించకుండా స్థబ్దతతో ఉండకూడదు. ఎన్ని బాధలున్నా చిరునవ్వు ముఖంపై నుండి చెరగనీయకుండా ఆత్మస్థైర్యంతో,మనోనిబ్బరంతో గతాన్ని ఒక పాఠంగా తీసుకుని వర్తమానంలో ఆనందంగా జీవిస్తూ భవిష్యత్తుకు బంగారుబాట వేసుకోవాలి.అప్పుడే జీవితం అమృతతుల్యంగా ఉంటుంది.